El Presidente del Principáu quier buscar un consensu tresversal sobre’l modelu d’oficialidá que más alantre se pueda treslladar al Estatutu.
L’Asturies pola que trabayamos tamién va tar arguyosa de la so cultura. Asistimos nesta Cámara a episodios insólitos de diputaos que marchen del hemiciclu protestando porque nun entienden l’asturianu. Mal asuntu cuando un parllamentu nun ye a entender lo que se fala na cai o arreniega de la so propia cultura.
Vamos dexanos d’esparabanes y sobreactuaciones por cuenta del asturianu y del gallego-asturianu. Nun tenemos qu’usar la nuestra llingua pa dividir, pa encerrizar una crispación que nun tien razón de ser. El mio Gobiernu quier lo contrario, propiciar un entendimientu ampliu que faiga posible evitar la desapaición d’ún de los elementos más preciosos del nuestru patrimoniu cultural. Nesta llexislatura tenemos la oportunidá de que se llogre. Hemos escaecer les provocaciones y buscar un consensu tresversal sobre’l modelu d’oficialidá que más alantre se pueda treslladar al Estatutu.
Esi va ser el camín del mio Gobiernu. Mentanto, vamos siguir avanzando. Pela primer vez fixéronse pruebes pa la certificación de los niveles de Llingua Asturiana, con una bona acoyida. La Conseyería de Cultura ta rematando la formación, tamién pionera, d’un Conseyu de la Cultura d’Asturies, que queremos constituyir nel mes d’avientu. De la mesma manera, recuperemos el Circuitu de les Artes Escéniques, a los que se sumaron los de la Lliteratura, Música, Artes Plástiques y Visuales y, p’acabar, el de Cultura Tradicional.
Cuando grabé’l mio primer mensaxe institucional por cuenta del Día d’Asturies, escoyí Santa María de Naranco. El siguiente escenariu foi’l Muséu de Belles Artes, que pudi visitar delles veces (y que, por cierto, llevaba ensin comprar obra nueva dende’l 2011). Col alcalde d’Uviéu percorrí San Miguel de Lliño y el Centru d’Interpretación del Prerrománicu, y con él me comprometí a da-y a la capital d’Asturies el protagonismu que merez nel Xacobéu 2021.
Nun son cuestióis pequenas: as mías apelacióis al arguyo de pertenencia básanse tamén na gran riqueza del noso patrimonio y na potencia dos nosos creadores. Señorías, a cultura asturiana vive un gran momento y temos que fer el posible pra catalizallo. Por eso, entre as medidas tomadas pra paliar os daños da covid tamén incluimos úa llinia específica de 500.000 euros pr’axudar a autónomos y trabayadores por conta propia del mundo cultural.
