Cuando’l viaxeru entra dende Navia al conceyu de Cuaña, y a pesar d’atopase a namás 158 quilómetros de la capital d’Asturies, ensiguida va vese a si mesmu nun paraísu bien guapu, con espaciu de mariña y de monte nel que se va afayando adulces nes sos munches ayalgues naturales, artístiques, hestóriques y sobre manera, humanes. Los habitantes del conceyu amuésense siempres cercanos al visitante, ayudando na busca de los puntos de más interés, que van apaeciendo detrás de cada curva de les carreteres de Cuaña, y afayando tamién al viaxeru, un pocu de la cultura popular, la gastronomía, la idiosincrasia del llugar. L’amabilidá de los mesmos fai qu’ensin saber cómo, puedas acabar tomando en «café de pota» en casa d’una duce vieya, o probando’l chorizu «feito en casa» que t’ufierta un home mientres posa les madreñes a la puerta casa, siempres abierta al viaxeru.

Siguiendo los rellabicos del conceyu, el castru de Cuaña, que los locales llamen Castellón, apaez discretu, con una apaciguadura que maraviya y asela al mesmu tiempu. El castru recuérdanos qu’ellí, fai más de dos mil años, yá poblaba la zona un pueblu entamáu, sofisticáu nel so momentu. Párense a ver nesti puntu la cámara en falsa bóveda y les canalizaciones de les cais que se caltienen nel conxuntu, amuesa d’esta sofisticación primitiva. Na Aula Didáctica del mesmu, puede unu conocer d’una forma entretenida, tolos detalles hestóricos del espaciu. Y pal que quede con gana de más castru, el conceyu ufierta otru conxuntu de gran valor históricu, el castru de Mouguías, que llama l’atención al conocedor d’esti tipu d’asentamientos, por tar nuna zona llana de la mariña y poro, arrodiáu de muria y con trés fosos escavaos na piedra, posáu nel llugar dende fai tamién más de dos mil años.

Esti paraísu verde que ye Cuaña consigue axuntar, en poco más de 65 quilómetros cuadraos, el conceyu númberu 56 en tamañu d’ente los 78 que tien Asturies, una gran cantidá d’elementos polos que merez la pena percorrer munchos quilómetros que nos van alloñando cada vez más del ruíu y les prieses, pa llevanos a pueblinos especiales y tan distintos entos ellos, como Porto, xunto al ríu, y Orbeye, colgáu na fastera d’un monte.

Si se tien más tiempu pa la visita ye conveniente averase a ver el Cercu discoidea, un bloque de granitu d’una sola pieza que provien de les tribus prerromanes y que aportó a cristianizada como A Pedra da Nosa Señora. Ta declarada Monumentu Nacional pol so perimportante interés.

Tres xoyes arquitectóniques destaquen en Cuaña: Santa María de Cartavio, una ilesia que nun caltien nada de la so primitiva construcción datada nel añu 976, sacantes una ventana en forma circular, una auténtica reliquia arquitectónica; El palaciu de Mouguías, un edificiu del sieglu XVIII con estructura en forma d’o, de la que fueron propietarios la familia Cienfuegos-Xovellanos, marqueses de Mouguías, y bien poderosos na Asturies de los sos años. La so fachada ye sobria, pero la construcción ye elegante ya inclúi capiella y una finca arrodiada por una guapa muria de piedra. Al pie d’estos dos, la quinta Xardón, un edificiu d’estilu eclécticu promovido nel so día por una familia d’importantes posesiones na zona.

Ensin dulda nenguna, un llugar pa perdese nuna fin de selmana o una ponte, ente la naturaleza y l’hestoria, y qu’ufre na so rodiada otros guapos conceyos pa visitar y que tán a tiru piedra.