¿Tuvisti dalguna vegada en Noreña? Ye una de les principales villes asturianes y unu de los destinos favoritos pa muchos visitantes que lleguen a Asturies, amás cunta con una variedá de sitios que conocer… Ye un llugar que tien la capacidá de que toa persona que lu visita, quiera volver.

1. La Casa Conceyu

Ye’l mio monumentu favoritu. La razón: foi’l primeru que vi na mio visita a la villa de Noreña. Edificiu renancentista que foi construyíu nel llugar qu’ocupó’l Colexu San José del Círculo Católico de Obreros. Enantes l’ayuntamientu ocupaba lo que fuere l’Hospital de Riba nel edificiu llamáu Hospital de Pelegrinos que fundó Gabriel de Lorenzana el 4 de xineru de 1593.

2. Palaciu del Rebollín

Trátase d’una de les meyores construciones palaciegues. Concebíu nun espaciu abiertu, ye un espaciu abiertu. Ye d’un edificiu de planta rectangular formáu pol baxu y un pisu, con galeria adintelada sobre columnes y una monumental escalera. Nesta estructura aprovechóse una edificación anterior, de finales del sieglu XVII de la qu’entá se conserva la so puerta principal

3. Quioscu de la música

Esti quioscu ye motivu d’arguyu pa tolos habitantes de Noreña pola so guapura y ser una de les obres más antigues de l’arquitectura del fierro n’Asturies. Dende la so creación en 1892, primer día d’Ecce Homo, por Arturo Bertrand Renard celebráronse una bona riestra de conciertos. Hai que destacar los xardinos qu’arrodien al quioscu, llindaos en 1904 con una guapaverxa de fierro.

4. Torre del reló

Foi una placer conocer la torre del reló y sobre too a Victor Fernández -El Reloxeru- que dende cuantayá acompañó al so pá y consiguió reiniciar la marcha del reló de la torre hacia l’añu 1947.

La torre del reló data del añu 1694 y sabemos que foi llugar de conceyu y cárcele. La torre ye de planta cuadrada (6,5 x 6,5m) con una altura ente 13 y 14 m, dividida en tres plantes. Tien un guapu campanariu con una vieya campana na que figuren dos inscripciones y una cruz. No que se refier al reló podemos afitar ensin mieu a enquivocanos que nun ye coetaneu a la torre, la so inscripción «Por José Martinez Relojero del Exmo. Ayuntamiento de Bilbao año 1864» da bona prueba d’ello.

5. Palaciu de Miraflores

Nel llinde más oriental de la villa, na zona de Ferrera alcontramos esti preciosu palaciu que pasa cuasi desapercibíu ente los visitantes. Anguaño cumple la función de centru de menores, lo qu’impidió que conociéremos los interiores d’esti espectacular palaciu.

Sabemos que foi construyíu por Gabriel de Lorenzana nel añu 1567. L’edificiu consta d’un patiu porticáu, asitiáu nel centru del edificiu con una galería de madera.

Na so fachada podemos ver l’escudu del sieglu XVII nel que se ven: Nel centru les armes del so fundador Gabriel de Lorenzana y de les demás families emparentaes col so fundador.

Tenemos que destacar una pequeña, pero encantadora capiella de 1760 dedicada a San Xuacu y Santa Ana asitiada al llau del palaciu.

6. Retablos de la Ilesia

N’entrando dientro la ilesia, quedemos ablucaos colos impresionantes retablos que s’alcuentren nel so interior.

Los retablos de la ilesia de Noreña, sieglos XVI, XVII y XVIII son de gran interés artísticu.

Los retablos qu’esistíen nesta ilesia fueron destruyíos tres el pasu de la Guerra Civil y los qu’anguño se conserven fueron trayíos dende Castiella y pasaron per un procesu de restauración impecable.

Ye importante destacar el Retablu Mayor de Juan de Juni (1564) Podemos dicir que ye un retablu fechu pa esibir la pintura, atribúyese-y al escultor Adrián Álvarez y foi restauráu a finales de la decada de 1990 por Jesús Puras.

Tamién destacamos el Retablu de L’Asunción de caracter barrocu nel que figura la imaxe d’esta virxe, donada en 1948 pola familia Fanjul Menéndez.

7. Ermita del Ecce Homo

Siguiendo’l nuesu paséu per Noreña de sópitu alcontramos esta preciosa Ermita na que ta la figura del Ecce Homo.

La primitiva capiella del Ecce Homo de 1665 foi incediada en 1901, anguaño entá se conserven restos de la so cabecera nuna casa asitada a 40 m más de l’actual.

Sosprendióme’l retablu nel que se puen ver figures d’anxelinos sobre fondos policromaos que simulen piedres nobles, tou un espectáculu artísticu.

8. Monumentu al gochu

Yá ye cuasi una tradición facese un selfie cola peculiar y conocida escultura dedicada al gochu. Emplazada nel entronque inferior del Paséu Fray Ramón y la cai del mesmu nome, ye obra del escultor felguerín José Luis Iglesias Luelmo.

Esti monumentu símbolu por escelencia de la villa, quier ser un homenaxe a la tradición y la importancia que tien el gochu. Inagurada’l 15 de setiembre de 2001 por iniciativa de la percélebre Orden del Sabadiego, y cola collaboración de la vecindá y el Conceyu ye un puntu d’alcuentru habitual y un llugar icónicu.

9. Depósitu del agua

Cuasi por casualidá y emplazáu mui cerca de la torre del reló y el Palaciu de Miraflores alcontramos l’antiguu depositu del agua, adende l’añu 2003 reconvertíu na Sala d’Esposiciones Antonio Mingote. Ye un edificiu construyíu en piedra. Les sos paredes ábrense na parte superior con óculos semicirculares.

10. Prau de los Riegos

Dempués de conocer toos estos prestosos llugares, atopé un sitiu perfectu pa descansar: el Prau de los Riegos.

Según me dixeron, nesti prau son mui habituales les romeríes nes fiestes del Ecce Homo. Un sitiu prestosu pa reposar na solombra y poner fin al nuesu viaxe pela Villa Condal de Noreña.