Mieres, un Antroxu de fartura

Catorce establecimientos van ofrecer estos díes menús especiales con platos propios d'estes feches

El Antroxu yá ta equí y en Mieres ta too llisto pa celebralo como merez. Les conceyalíes de Festexos y Comerciu entamaron un ampliu programa d’actividaes que va enllenar les cais de lluz, color, música, baille y amarutes. Pequeños y mayores van esfrutar d’una de les cites más destacaes del calendariu festivu del conceyu.
Amás, anguaño’l Antroxu llega con una novedá, unes Xornaes Gastronómiques nes que participen 12 establecimientos hosteleros y dos hoteles ufiertando precios especiales pa esfrutar estos díes de fiesta. Bar Prau Ferrera, Casa Migio, Casa Nando, Cenador del Azul, Hostal La Peña, L’Albar, La Consistorial, La Viña, Mesón La Panoya, Sidrería Alonso, Sidrería La Violeta, Vinoteca Las Novedades, amás del Hotel Mieres del Camín y l’Hotel Rural Cenera van ufiertar mientres los díes 25, 28 y 29 de febreru y 1 de marzu un menú compuestu por pote na so versión antroxera y postres típicos asturianos como los frixuelos, picatostes, casadielles y arroz con lleche.
La programación festiva pa los dos díes de’ntroxu en Mieres ye la siguiente:

Martes, 25 febreru. Antroxu Infantil

17 h. Pasucais a cargu la charanga “Barullu”.
17.30 h. Desfile-Concursu disfraces. Abierta participación a grupos, individuales y pareyes). Cola presencia de la Truchona del Caudal.
18.30 h. Entrega de premios nel Parque Xovellanos, con Chus Casado como maestru de ceremonias y pequeña pieza teatral “Las Pirratas del Caudal”. Pasucais y Teatru al cargu de Quiquilimón Teatro.

Vienres, 28 febreru. Gran Antroxu

12.30 h. Velatoriu La Truchona Guisandera del Caudal, por Teatru Margen, na plaza l’Ayuntamientu.
19.30 h. Pasucais a cargu de les charangues “Xaréu nel Ñeru”, “Los Restallones”, “Los Tardones” y “Los Acoplaos”.
20 h. Cortexu La Truchona Guisandera del Caudal nel camión mortuoriu, con acompañamientu de los fantasmas la finada y charangues, peles cais La Vega y Manuel Llaneza.
20.30 h. Truena d’aniciu, con abondu ruíu volaores, dende Vascu-Mayacina.
20.35 h. Desfile-Concursu. Abierta la participación a grupos, charangues, murgues, carroces, carromatos, etcétera, individuales y pareyes). Abriendo’l desfile, la Reina del Antroxu: La Truchona Guisandera del Caudal, que ye de ríu y non de mar.
Ya nel Auditoriu del Parque Xovellanos:
21.35 h. Xaréu d’Antroxu: actuación de charangues.
21.55 h. Llectura por D. Carnal del Testamentu y últimes voluntaes de la Truchona Guisandera del Caudal.
22 h. La quema de la finada acompañá d’escandalera pirotécnica.
22.05 h. Entrega de premios a los ganadores del Concursu-Desfile.