El mundu metaleru ye perampliu en tou’l globu. De fechu, ye tamién mui estenso nel nuesu país, pero de xuru que munchos y munches nun imaxinen qu’una bona cantidá de bandes, sobre too de power metal, creáronse na nuesa comunidá. Güei queremos presentavos unes cuantes bandes de metal que destaquen n’Asturies, delles más conocíes qu’otres, y cuasi toes nacíes al rodiu del sieglu XXI. Dalgunes d’elles sirvieron pa dar los primeros pasos del metal nel principáu y, magar que agora mesmo nun tean actives o tean disueltes, dieron llugar a grandes grupos que tán a la orden del día nel panorama metaleru asturianu. Sobre too, destaca la hermandá que reina nesti contestu, enllenu collaboraciones, intercambios de miembros, de proyeutos que nacen gracies a l’amistá ente los músicos de les distintes bandes… Dende llueu, y magar que tenemos la costume de mirar hacia afuera enantes de ver lo que tenemos al nuestru alredor, nun podemos inorar esta cantera de la que surdieron y siguen surdiendo grandes temes del metal español que, n’ocasiones, aporten una bona dosis d’estilu norteñu a la música.

Drunken Buddha

Entamamos con una banda xixonesa fundada durante l’añu 2012. Trátase d’un hard rock de corte más clásicu al que van añadiendo influencies más actuales, confiando nes aportaciones de tolos miembros del grupu, les sos propies personalidaes y estilos. Toos ellos cuenten con llargues trayectories nel ámbitu musical, y la mayoría procede de distintes formaciones y proyeutos musicales.
Xuníos pola necesidá d’escapar de los soníos reinantes, decidieron formar Drunken Buddha, con un soníu más vintage y suciu, delles vegaes más escuru, pero sobre too con un estilu más averáu al hard rock setentero con alusiones al stoner, heavy metal y a les primeres bandes de doom como Black Sabbath o Pentagram. Ún de los acontecimientos más importantes pa la banda foi, ensin dulda, ganar el concursu Wacken Open Air Metal Battle Spain 2019, que los llevó n’avión hasta esti festival, unu de los más importantes festivales de metal nel mundu.

Taranus

Taranus ye una banda asturiana de folk metal con lletres escrites n’asturianu (les que más), y en bretón ya italianu más ocasionalmente. Los sos cantares caracterícense por variar ente ritmos más melódicos y calmaos. Esta banda formóse nel añu 1994 ente les influencies del heavy metal de grupos tan reconocíos como Manowar, y el folk de bandes asturianes como Llan de Cubel, pero nun foi hasta munchu tiempu depués, nel 2009, que los guitarristes Xesús Nel García y Antonio Caballo decidieron refundar la banda con músicos d’otres agrupaciones asturianes. Asina, resurdieron como un folk metal que pue recordanos, n’ocasiones, a grupos tan emblemáticos como Mägo de Oz.
Foi n’avientu de 2012 cuando sacaron el so primer discu homónimu, un álbum que recueye lletres reivindicatives con espaciu pa la historia, cultura y lleendes d’Asturies. N’él podemos atopar, amás, referencies a la Revolución d’Ochobre de 1934, pero tamién a la mitoloxía astur. Combinen voces masculines, delles vegaes guturales, con voces feminines que particularicen entovía más a la banda. Los instrumentos musicales van dende la guitarra eléutrica, el baxu y la batería, hasta los whistles, les gaites, les bombardes y la guitarra española.

Monasthyr

Monasthyr ye otra de les bandes asturianes más moces. Creóse durante el branu de 2008 baxo les influencies del heavy metal que, dependiendo’l cantar, pue averase más al power metal (como nel casu de Templo de Terror), o al hard rock (como nel cantar Tu Piel). Entamó la so carrera musical con Willy al micrófonu, Alfonso Gallardo a la batería, David Carracedo a la guitarra rítmica y Julio Gayo al baxu. Poco depués, incorpórase Diego P. G. a la banda como segundu guitarrista, quien garra les riendes de la composición musical. Un añu depués, sal a la lluz el primer EP y, posteriormente, el discu Mil Noches Bajo el Sol. Con esti álbum, vanse de xira por tola xeografía asturiana y terminen teloneando a grupos de tan altu nivel como Panzer y Sauron.
Por embargu, sufrieron un parón hasta l’añu 2012 tres la salida de Willy, Alfonso y Diego de la banda. Foi nesti añu cuando se xunieron Axel ya Imanol Castela pa dar forma a un nuevu proyeutu y, nel 2013, Jorge Sanz a la voz y Camilo Rodríguez a la guitarra tres la salida de Carracedo. Nel añu 2015, Javy González incorporóse a la banda como guitarrista solista y tres compartir escenarios con agrupaciones de renome como Obús, Barón Rojo y Medina Azahara, deciden grabar el so segundu discu en 2017 baxo’l títulu de Templo de Terror.

Arenia

Arenia ye otra banda xixonesa de reciente creación (2009). Por embargu, constituye la evolución d’una agrupación anterior conocía como Atlas que tuvo’l so periodu d’actividá ente los años 2000 y 2009. Arenia supón un cambiu d’orientación musical y la salida de varios componentes de la vieya alliniación. Foi a mediados del 2009 cuando Eduardo Dizy, Alejandro Fernández y Raquel Rodrígez decidieron camudar el nome y crear Arenia, reclutando asina a Fran J. Santos como vocalista y a Roberto Suárez como baxista.
El so estilu musical básase nel power metal épicu, al que ellos mesmos denominen como “metal mítico”, yá que los cantares traten temes mitolóxicos de corte épicu, como pue apreciase nel so últimu trabayu La Voluntad de las Estrellas. En 2012 editen el so primer discu de llarga duración baxo’l títulu de Cuando el Mundo Despertó, nel que collaboró Nathan Cifuentes (Vendaval). L’álbum constituye una metal-ópera inspirada na teogonía de Hesíodo. Esi mesmu añu, Arenia edita un EP dixital tituláu La Sombra de Atlas que recueye regrabaciones de dellos temes de la antigua banda.
Nun ye hasta xuliu de 2019 cuando sal a la lluz el so últimu álbum yá mencionáu, La Voluntad de las Estrellas, ensin dulda’l proyeutu más ambiciosu de la banda asturiana que cuenta con collaboraciones d’alto nivel, como Henning Basse (Firewind), Marcos Rodríguez (Rage / Diolegacy), Markus Pohl (Mystic Prophecy) o Israel Ramos (Avalanch), asina como de la formación coral Coro Joven de Gijón pa ún de los cantares.

Darna

Darna ye una d’eses bandes de power metal asturianes qu’entamaron los sos andancios nel añu 1998 n’Uviéu. Lo que comenzó siendo un proyeutu pronto transformóse nuna sólida agrupación constituyía por Dani Sevillano (guitarra), Ruth Suárez (voz), Álvaro Jardón (bajo), Rafael Yugueros (batería) y Silvia (guitarra). En dos años entamaron a ellaborar los cantares que-yos permitiría dar varios conciertos per Asturies. Depués d’ello, decidieron comenzar a grabar el que sería el so primer álbum, baxo’l nome de Darna, llanzáu en xunu de 2002.
En setiembre d’esi mesmu añu incporporóse’l baxista Alfonso Carrera pa suplir la salida d’Álvaro Jardón. A partir d’ehí, ofrecieron numberosos concciertos por tol país. Tres l’últimu conciertu, en xunu de 2003, volvieron a los estudios pa grabar el so segundu discu, que recibiría’l nome de “II”, enllenu ritmos y melodíes fuertes. Esti álbum supón un importante cambéu d’estilu. Sorpréndennos con un soníu más rotundu y espectacular, y redirixiendo la temática lletrística hacia un entornu más urbanu. En definitiva, unos cantares d’estructures más complexes, con riffs de guitarra más poderosos y una gran habilidá pa capturar a los oyentes.
Por desgracia, la banda disolvióse oficialmente nel añu 2004, y tolos miembros iniciáronse en nuevos proyeutos musicales.

Avalanch

Avalanch ye un grupu emblemáticu del panorama metaleru n’Asturies. Formóse nel añu 1993 pol guitarrista Alberto Rionda.
Nos entamos, los trés primeros álbumes ofrecíen un estilu más cercanu al power metal, con una lletrística orientada a los temes mitolóxicos. Por embargu, tres la espulsión del vocalista Víctor garcía, la banda recorrió nuevos mundos más averaos a un estilu de heavy metal tradicional y con lletres más profundes.
Con un parón indefiníu que duró dende’l 2012 hasta el 2016, Alberto Rionda decidió retomar la banda con motivu del aniversariu del álbum Ángel Caído, pero con una alliniación totalmente renovada. Actualmente, la banda ta compuesta por Rionda (guitarra), Israel Ramos (voz), Jorge Salán (guitarra), Manuel Ramil (teclaos), Dirk Schlächter (baxu) y Mike Terrana (batería).
Magar que se trata d’una de les agrupaciones más antigües del panorama asturianu, son pioneros na distribución y promoción musical al traviés d’Interné, en plataformes como iTunes Music, Store, Napster, MSN Music… Asina, el videoclip Alas de Cristal foi el primer videu musical español disponible en formatu iPod.

WarCry

Nun podemos facer una llista de bandes de metal asturianes ensin facer referncia a WarCry, otra de les agrupaciones más emblemátiques de la rexón y con una notable presencia internacional, sobre too en Latinoamérica.
El grupu formóse nel añu 2002 cuando Víctor García y Alberto Ardines fueron espulsaos de Avalanch. Pablo García y Fernando Mon incorporáronse a la banda depués d’actuar como guitarristes invitaos col llanzamientu del primer álbum homónimu. Na actualidá, y tres varies ides y viníes, l’agrupación ta conformada por Víctor García (voz y composición), Pablo García (guitarra y coros), Roberto García (baxu y coros), Rafael Yugueros (batería) y Santi Novoa (teclaos). Nel so periodu d’actividá, contó tamién cola presencia de Álvaro Jardón al baxu (2002 – 2004).
Les primeres obres de WarCry presentábanse so un estilu direutu de power metal, con bateríes agresives de doble bombu y agudos gritos vocales. Les referencies a les hestories medievales y épiques consituyíen una tónica xeneral nos primeros álbumes. Más alantre, la música comenzó a enllenase de riffs de guitarra, bateríes más pausaes y un estilu más melódicu nes voces. El soníu fízose más suave y reflexivu, con lletres más introspectives y sociales. El penúltimu álbum, Donde el Silencio se Rompió, ye una bona muestra d’esti cambéu progresivu, la culminación d’una banda que, actualmente, s’alcuentra nun parón indefiníu a la espera de retomar la composición con más enerxía que nunca.

Last Days of Eden

Esta banda, formada nel añu 2002, entamó como un proyeutu d’estudiu enfocáu n’esplorar nuevos senderos musicales. Cuntaba nos sos inicios con Dani G. (DarkSun) y Lady Ani (Soprano y cantante d’estudiu). Combinen elementos sinfónicos, de power y folk metal, con influencies destacables de bandes como Nightwish, Epica, Within Temptation y Eluveitie.
Nel 2015 firmaron el so primer contratu con un sellu discográficu alemán pa grabar el primer álbum, tituláu Ride The World, el cualu llevólos de xira por toa Europa a lo llargo del añu 2016. Ye a fines d’esti mesmu añu cuando graben Traxel Mör, un discu más orientáu al folk con toques sinfónicos nel que incluyen la llingua asturiana nún de los sos cantares. L’últimu discu salió nel 2018 so’l títulu de Chrysalis, ya incluye once temes de folk / symphonic metal. Tres esti llanzamientu incorporóse a la agrupación Adnrea Joglar, una de les primeres muyeres en ganar el premiu internacional McCallan, tres la salida de Pindy Díaz.
Actualmente Last Days of Eden ta formada por Lady Ani (voz), Dani G. (guitarra y voz), Juan Gomes (teclaos), Adrián Huelga (baxu), Lao Duarte (batería), Sara Ember (violín) y Andrea Joglar (gaites y whistles).

Nörthwind

Nörthwind foi una banda asturiana de power metal fundada a entamos de 1998 por Constantino Hevia (guitarra), Luis Fernández (guitarra), José Gálvez (baxu) y Rubén González (batería). Con unes lletres orientaes a la fantasía, y siempres n’inglés, los integrantes de Nörthwind sentíanse representaos por esti nome, yá que-yos confería un aire épicu acorde coles composiciones previes. Amás, relacionábase colos fuertes vientos del norte de la Península Ibérica, la so tierra natal.
Los cantares fueron traducíos al castellanu y, tres un tiempu d’ensayos, Rubén decide pasase a la voz y entra un nuevu baterista a la banda, Fernando Argüelles. Depués de la marcha de Rubén, un mozu y prometedor vocalista, Txema Trinidad, incorpórase a la banda y otorga-y la solidez vocal que necesitaba, encaxando con maestría tanto nos temes anteriores como nes posteriores composiciones.
La primer demo, orientada a una composición más orquestal, nomóse La Primera Cruzada. Gracies a esta grabación, consiguieron un primer premiu y el puestu de finalistes en dos categoríes del Concursu Nacional de Maquetes NIVEL 0, que celebró la final na Semana Negra de Xixón nel añu 2000. En xuliu d’esi mesmu añu, inicien la grabación del so primer discu so’l títulu de Viento del Norte, el cualu sal a la lluz el primeru de marzu de 2001 con una orientación más sinfónica que nos recuerda a los cantares de bandes como Rhapsody of Fire y Blind Guardian.
Poco depués, deciden emprender un nuevu proyeutu musical, el primer discu d’una triloxía tituláu Crónicas de Áravan – El Retorno del Rey, una hestoria conceptual que sal a la venta nel añu 2002 y colócase nel númberu 4 de la llista Tipo. Por embargu, dos años depués el grupu esmémbrase. Per un llau, Txema Trinidad, Fernando Argüelles y Miguel Fernández, tres una discusión interna de la banda, deciden fundar un nuevu grupu so’l nome de Vendaval. Per el so llau, Tino Hevia, Helena Pinto y Dani González formen DarkSun, de la que falaremos a continuación.

DarkSun

DarkSun ye’l resultáu de la escisión de Nörthwind en 2002, con una fuerte influencia de bandes internacionales como Blind Guardian, Helloween, Angra y Rage. Nos sos entamos, taben formaos por Tino Hevia, Daniel González y Helena Pinto, pero pronto se-yos xunieron Pedro Junquera (baxu) y Daniel Cabal (batería). Y tan tempranu como en 2003, desplazáronse hasta Alemania pa grabar el so primer discu, El Legado, asoleyáu en xuliu de 2004. Tres la xira de presentación, entraron de nuevo a los estudios pa grabar el segundu discu baxo’l títulu El Lado Oscuro.
Con una nueva formación, el tercer álbum, Libera Me, vio la lluz en setiembre de 2008. Trátase d’un discu conceptual al rodiu d’una hestoria d’amor tráxica ente dos persones que tuvieron que facer un pactu col diañu. En 2009 anunciaron que taben trabayando nel so próximu discu, una obra que vería la lluz a principios del 2010 col títulu Tocar el Sol, que cuntó cola collaboración de Víctor García, vocalista de WarCry. Memento Mori, l’últimu trabayu de la banda, publicóse en xunu de 2012 y cunta cola collaboración de Ralf Scheepers (Primal Fear), y Peavy Wagnwe. Nesti álbum prima la premisa de vivir al máximu les nueses vides, d’esfrutar enantes que nos alcance la muerte.
En 2014 surde la idea de regrabar parte de los cantares que componen Crónicas de Áravan, de Nörthwind, El Legado y El Lado Oscuro, con una votación pa que los fans escoyeran los doce cantares más representativos de les trés etapes musicales. El discu sal a la venta en 2016 con una versión n’inglés que comprende nueve cantares. Por embargu, la actividá de la banda interrumpióse en 2018 pola necesidá de los sos integrantes de trabayar n’otros de los sos proyeutos musicales, asina como de volver a los estudios con nueves y renovaes idees.

Vendaval

Vendaval ye la otra agrupación musical creada a partir de la desintegración de Nörthwind. El grupu, de la mano de Txema Trinidad, Miguel Fernández, Fernando Argüelles y Luis Fernández, pretende alloñase del epic power metal carauterísticu de Nörthwind y poner n’escena una mezcolanza ente’l heavy metal más tradicional con ritmos contundentes y temes direutos y potentes.
En 2003 asoleyen el so primer discu homónimu, qu’incluye un homenax a la mítica banda Panzer. En 2005 sal el so segundu trabayu, Mi Otra Mitad, y dos años depués sal a la lluz el so tercer álbum tituláu Estigmas. N’esti álbum la banda prautica un estilu más melódicu y modernu, con arreglos de teclaos hasta’l momentu inesistentes.
Con motivu del décimu aniversariu de Vendaval nel añu 2012, deciden automoneaxease y graben un cuartu álbum tituláu Arba’a, que sal a la venta en payares del mesmu añu. N’él, avérense a un soníu más contundente y ellaboráu, con temes cercanos al power metal y a un heavy metal más agresivu y convencional.
Ensin dulda, ún de los llogros más importantes de la banda ye la grabación del so últimu álbum, Por el Tiempo, qu’entamó en xineru de 2017 y asoleyóse en payares d’esi mesmu añu, con collaboraciones tan notables como Fabio Lione (Rhapsody Of Fire, Angra, Turilli / Lione Rhapsody…), José Cano (Centinela) y Manuel Rodríguez (Gixëh, ex – Sphinx). Pa la grabación d’esti últimu álbum, amás, cuntaron cola incorporación del músicu más mozu, Iván Batalla (baxu), quien se encargó de la ellaboración de los video lyrics de tolos cantares pa YouTube, y contribuyó significativamente a la creación de la contraportada ya illustración del discu.