Bandera d'Asturies

El 25 de mayu ye ún de los díes más emblemáticos de la hestoria d’Asturies. Esta efeméride recuérdanos los sucesos d’esi mesmu día nel añu 1808, en plena invasión francesa. N’Asturies, que dende siempre foi una rexón más aisllada que’l restu de les provincies españoles, les noticies de la invasión aportaron una selmana más tarde a caballu dende Madrid. Por embargu, la petición de Napoleón de subxugar a tolos españoles nun foi bien acoyía polos asturianos, quien s’axuntaron pa facer frente al exércitu francés, creando la primer rebelión con soberanía popular.
Too comenzó yá nel mes d’abril, cuando les tropes franceses percorríen España como si yá la tuvieran conquistada. En Xixón estallaron los ánimos cuando’l cónsul francés de la villa, Michel Lagonier, llanzó panfletos escontra la monarquía española y, poco depués, viose obligáu a fuyir d’Asturies a Galicia.
Nun primer momentu, nel 9 de mayu, decidieron desacatar les órdenes que llegaben de la capital depués de qu’una columna d’estudiantes y maestros armeros vizcaínos asaltaran la fábrica d’armas ya intentaran tomar l’Audiencia. Pero nuna sesión de la Xunta Xeneral celebrada’l día 13, asustaos poles consecuencies de la desobediencia, camudaron la so decisión ignorando les peticiones del pueblu y quitáron-yos les armes.
El mieu yera xeneral. Nos díes siguientes al 9 sucediéronse dende amenazes hasta cambeus de bandu. El día 19 de mayu el Gobiernu Central unvia un correu estraordinariu avisando de que hai tropes dirixiéndose a Uviéu dende Valladolid y Bilbao col envís de someter a la población y, amás, con un plazu de 24 hores pa desarmar la ciudá baxo pena de muerte. Por embargu, los miembros de la Xunta (Ponte, Agustín Argüelles y Cifuentes) parten d’Uviéu en diferentes direiciones pa reclutar el mayor númberu de soldaos posibles pa resistir l’ataque francés.

Xovellanos diseñó una bandera pa les milicies que caltiénse, con dalgunes variaciones, como estandarte d’Asturies

El día 21 de mayu llegó a Uviéu un coronel de la Lexón d’Honor de Napoleón acompañáu d’ocho componentes de la Guardia de Corps cola orde de fusilar a tolos miembros de la Xunta Xeneral qu’apoyaran la rebelión del 9 de mayu. Lo que nun sabíen yera que taben en camín 2000 homes que ficieran campamentu en San Lázaro con Ponte, y otros tantos en San Cristóbal y Otero con Agustín Argüelles y Cifuentes. Ponte aportó’l día 24, y dende la fábrica d’armas repartieron fusiles a les sos tropes que se dividíen en trés columnes per tola ciudá.
Asturies formó’l so Exércitu Defensivu y encomendó al illustre Xovellanos el diseñu d’una bandera pa les milicies; una bandera que, a día de güei, caltiénse con lixeres variaciones como l’estandarte d’Asturies. La d’aquel tiempu llevaba grabada, en lletres doraes, la frase «Asturies xamás vencida».

El 25 de mayu foi la primer vez en tola historia d’España qu’un pueblu se facía cola soberanía

Joaquín Navia Osorio y Miranda ye nomáu Xeneral en Xefe del Exércitu del Principáu y, poco depués, escueye dellos delegaos pa unviar a la embaxada de Gran Bretaña a la gueta d’aliances escontra’l mayor estratega militar d’Europa. Años depués, nel 1814, la Guerra d’Independencia llega al so términu.
Ye de destacar el valor de los asturianos que llucharon pol caltenimientu del rey español y los ideales que dexaran los intelectuales de la Illustración. Amás, foi la primer vez en tola historia d’España qu’un pueblu se facía cola soberanía, col gobiernu, dalgo que, a día de güei, constituye les bases de la nuesa democracia. Un periodu, dende llueu, pa nun escaecer, y un día, el 25 de mayu, para guardar na memoria de la historia asturiana.