Feria taurina de Begoña, Xixón
Semeya d'archivu d'una corrida del añu pasáu.

La feria taurina de Begoña queda fuera del calendariu festivu xixonés d’esti branu. La crisis sanitaria derivada de la pandemia de la Covid-19 traxo consigo la suspensión de bona parte de los eventos programaos pa los meses branizos. Una programación de la que tamién se cai agora la feria taurina de Begoña. Divertia Xixón y Circuitos Taurinos alcordaron esti llunes la cancelación de la feria d’esti añu. La empresa organizadora del festexu argumenta que la so celebración ye invidable daes les restricciones de públicu derivaes de la crisis sanitaria.
Otramiente, alcordóse la suspensión del contratu, según del abonu del canon correspondiente a la celebración de la feria. Amás, va caltenese’l mesmu númberu de prórrogues, polo que la empresa enllargaría’l so alcuerdu d’organización del certame hasta 2022. D’esta manera, Circuitos Taurinos S.L. va rexistrar el so arrenunciu a la celebración de la feria 2020 nes próximes hores y va refugar solicitar cualquier tipu d’indemnización pola cancelación de los festexos d’agostu de 2020.