Blockchain Sidra de Asturias
Un código QR permite acceder a la información completa sobre la trazabilidad de cada botella de sidra. / Llagar Castañón

Conocer la pumarada y la fecha de mayáu de les mazanes coles que s’ellabora la sidra yá ye una realidá. La denominación d’orixe Sidra d’Asturies y la Fundación CTIC xuniéronse p’aplicar la tecnoloxía blockchain a la nuesa bébora más tradicional. Sidra Castañón y Sidra Menéndez participen nun proyectu piloto que dexa conocer la información completa sobro la trazabilidad de la botella que se ta consumiendo.
El blockchain ye un sistema d’estructura de datos que dexa realizar un siguimientu completu del procesu d’ellaboración de la sidra con denominación desque se recoyer les mazanes hasta que llega a les barres de los chigres. Les botelles de les marques Val de Boides, Val d’Ornón y Menéndez Ecolóxico van incorporar d’equí p’arriba un códigu QR que va poder ser escaniáu pol consumidor. Al traviés del so teléfonu móvil, esti va recibir información sobro l’orixe de la mazana, les variedaes utilizaes, notes de cata y llote de comercialización, amás otros datos del procesu d’ellaboración siguíu.
Per aciu esta tecnoloxía, el consumidor va poder conocer de primera mano tola información del productu certificada pol Conseyu Regulador de la DOP Sidra d’Asturies. Una midida empobinada a aumentar l’enfotu del consumidor nel etiquetáu.