El tiempu detiense en Somiedu. El verde de los praos y los montes ye una constante nel conceyu. Osos, venaos, corzos y urogallos pueblen unos montes que fueron testigos directos del pasu del tiempu. Un paisaxe selvaxe qu’apenes camudó pola acción del home y nel que namás sobresalen les sos encantadores aldegues y los tradicionales teitos. Y ye que Somiedu ye naturaleza n’estáu puru.
El conceyu, qu’ocupa una estensión total de 39.164 hectárees, foi declaráu Parque Natural en 1988 y Reserva de la Biosfera pola Unesco nel añu 2000. La visita entama na so capital, La Pola. Ellí atópase’l Centru de Recepción ya Interpretación del Parque Natural de Somiedu (985 76 37 58 o adl@somiedo.es). Esti espaciu alluga la Oficina d’Información turística, que permanez abierta tol añu y na cual asítiase una esposición permanente con fotografíes ya información sobre la flora y la fauna qu’habita’l parque.


El conceyu cunta con trenta y ocho núcleos de población distribuyíos a lo llargo y anchu del accidentáu relieve del conceyu. Son, na mayoría de los casos, pequenes aldegues que caltienen la ensencia de l’arquitectura tradicional. La caza, la pesca o l’esquí de fondu son dalgunes de les actividaes comunes en Somiedu, xuntu col espectáculu de la berrea nel empiezu de la seronda.

Paraísu de rutes

Pero Somiedu ufierta un cientu de planes pal turista que quier esfrutar de la naturaleza en primer persona. Esisten dolce rutes perfectamente señalizaes para afayar de punta a punta esti pequenu paraísu de brañes, llagos y montes onde’l tiempu paez detenese. Y hai para tolos públicos: pueden faese a pie, en bici de monte o a caballu. Una de les rutes más frecuentaes ye la del Valle de Llagu. Son seis kilómetros de percorríu per un camín prácticamente rectu y ascendente que nos treslladará a traviés de paisaxes nos qu’esfrutar de la flora, fauna, xeoloxía y de los emblemáticos teitos, cabanes con techu vexetal típiques de la zona.

Mui cerca d’ellí atópense los llagos de Saliencia. L’accesu ta perfectamente señalizáu dende’l Valle de Llagu, polo que ye posible visitar tol conxuntu na mesma escursión. En Saliencia podemos atopar cuatro llagos: la Calabazosa o Llagu Negru, Cerveriz, la llaguna de Almagrera o La Mina, y La Cueva. La zona tien pasáu mineru y la so buelga sigue presenta entá anguaño. Nestos montes allugóse la última mina de fierro d’Asturies n’actividá. Tiense documentáu’l so funcionamientu dende empiezos del sieglu XIX y tuvo actividá hasta la década de los 70.

El valle de Saliencia allugó la última mina de fierro d’Asturies n’actividá, en funcionamientu hasta los setenta

Somiedu foi pa los romanos el nexu d’unión cola meseta, principalmente al traviés del so puertu, convirtiéndose en parte del itinerariu de l’antigua calzada qu’anguaño conocemos como Camín Real de la Mesa. La buelga romana entá puede apreciase en les necrópolis tumulares que los sos muertes entá pueden atopase nesta ruta. Si visites el conceyu, nun puedes dexar d’averate a fotografiar l’impresionante horru de Urría, cola so peculiar cubrición a base d’escobes y piornos, a imaxe y semeyanza de los teitos. Y nada meyor que cerrar la xornada que con una parada nel mirador del Príncipe. Asitiáu a 1373 metros d’altor, nel denomináu altu del Cuernu, onde vas poder almirar los visos del conceyu.