Asturies ye un destín turísticu seguru. La viceconseyera de Turismu, Graciela Blanco, destacó que la xestión de la crisis sanitaria y el refuerzu de los protocolos nel sector permitieron fortalecer la imaxe d’Asturies como destín seguru. Blanco señaló que la respuesta a la pandemia de la covid-19 na comunidá resultó clave pa tresmitir enfotu, a lo que se añede l’esfuerzu que realicen tanto la población como los distintos sectores económicos pa incrementar la seguridá. «El compromisu de los profesionales del turismu colos protocolos y les midíes sanitaries fueron fundamentales pa reactivar el sector», sorrayó.
Al so xuiciu, esti fechu tamién contribuyó a qu’Asturies figure ente les comunidaes que lideren la reapertura d’hoteles n’España, tal que figura nel últimu informe de la Federación Española d’Empreses de Distribución a Hostelería y Restauración. Por ello, la viceconseyera animó al sector a siguir invirtiendo en seguridá, «la opción más rentable pa cualquier establecimientu».
El Programa de Garantía y Reactivación Turística, ellaboráu pol grupu de trabayu creáu n’abril pa facer frente a la crisis sanitaria, inclúi midíes que van dende la reorientación de les campañes de promoción al impulsu de la formación. Nesti sentíu, fortalecióse l’aprendizaxe de los profesionales del sector en distintos protocolos de seguridá pa la contención de la pandemia.
Nel ámbitu de la promoción, en mayu púnxose en marcha la campaña Asturies, tas faciéndolo bien, a la que se sumó otra específica pal usu responsable de les playes, realizada en collaboración cola Federación Asturiana de Conceyos (FACC).