La plaza del Centru Niemeyer tresfórmase nun autocine

La fachada del Auditoriu, acabante restaurar, va convertise na pantalla de proyección de seis películes

El Centru Niemeyer tresfórmase esti branu nun autocine. La programación supón una combinación d’obres clásiques y contemporanees que toma diverses temátiques y xéneros. Asina, la primer selmana del autocine va empezar col clásicu italianu de 1988 Cinema Paradiso, que recibió’l Oscar a la meyor película de fala non inglesa al añu siguiente del so estrenu. La segunda proyección, el drama francés Especiales, de los directores de la popular Intocables, céntrase nel mundu del autismu. Alzóse col Premiu del Públicu del Festival de San Sebastián de 2019. Pa zarrar la selmana, Guy Ritchie vuelve a los sos oríxenes siguiendo la sienda de los sos célebres Snatch. Cerdos y diamantes o Lock & Stock col ‘thriller’ The Gentlemen, protagonizáu, ente otros, por Matthew McConaughey, Hugh Grant y Colin Farrell.
L’ecuador del autocine va llegar cola película francesa d’animación La famosa invasión de los osos en Sicilia. La comedia estadounidense Todos queremos algo, va cerrar el mes de xunetu y col drama coproducido per Suecia, Xeorxa y Francia tituláu Solo nos queda bailar (Premiu del Públicu nel Festival de Sevilla 2019) va ponese fin a la programación d’esti autocine de 2020.
La señal d’audiu de los llargumetraxes va recibise nos vehículos al traviés d’una emisora FM instalada na Plaza del Centru Niemeyer. La proyección podrá vese na fachada del Auditoriu, acabante saniar, restaurada y pintada pa esta ocasión. Énte ella, un máximu de 70 vehículos van poder esfrutar del cine de branu dende la seguridá y comodidá de los sos propios automóviles.

Venta d’entraes

Los espectadores van poder salir de los sos vehículos antes y mientres les proyecciones pa consumir productos de la cafetería del Centru Niemeyer o utilizar los aseos, siempres y cuando se respete la distancia de seguridá y fáigase usu del mázcaru en tou momentu. Los vehículos van poder aportar a la plaza dende les 22:00. El preciu de les entraes va ser de 5 euros por persona, 3 euros pa la entrada amenorgada.
Les entraes podrán adquirise anticipadamente dende’l día 16 de xunetu na taquilla del Centru Niemeyer, Citpa Uviéu y Llaboral Ciudá de la Cultura y na web del centru Niemeyer. El día de cada proyección la vienta presencial na taquilla del Centru Niemeyer va rematar a les 20:30 y la vienta telemática va concluyir a les 22:30.