Mieres cancela Los Mártires de Valdecuna y el Mercáu Asturianu de Cenera

El Conceyu y los organizadores alcuerden suspender les celebraciones d'anguaño

Mieres queda ensin dos de les grandes cites del calendariu festivu. El Conceyu de la localidá informó de la cancelación de Los Mártires de Valdecuna y del Mercáu Asturianu de Cenera. Dambos eventos celébrense tradicionalmente en septiembre. El consistoriu local tomó esta decisión n’analizando toles posibilidaes y «priorizando en tou momentu la seguridá y el cumplimientu de les midíes establecíes coles mires de contener l’andada del coronavirus». Les conceyalíes de Festexos, Turismu y Comerciu, xunto cola Asociación de Vecinos Llanduelu de Insierto y Asociación de Vecinos de Cenera, optaron pola cancelación al tratase de cites multitudinaries que nun tienen cabida na actual situación sanitaria.
La romería de Los Mártires de Valdecuna enllena cada 27 de setiembre Cuna y Cenera. Miles de romeros siguen la misa y dempués toos afacer nes proximidaes del santuariu y per tol valle pa dar bona cuenta en perfecta harmonía d’una comida asturiana campestre, regada cola meyor sidra. La fiesta foi declarada Fiesta d’interés turísticu. Multitudinariu ye’l Mercáu Asturianu de Cenera. Un mercáu d’ambientación tradicional asturiana nun enclave natural llenu d’antigües edificaciones de piedra y horros. Grupos de teatru asturianu y d’ambientación animen una xornada na que nun falten los puestos de comida típica asturiana y chigres onde tastiar la meyor sidra.
Tanto’l Mercáu Asturianu de Cenera como Los Mártires de Valdecuna van volver en 2021 a vistir de fiesta, tradición y romería el conceyu y toa Asturies.