Dio a conocer el so nome nel mundu enteru. El Quesu de Cabrales ye unu de los más cotizaos dientro y fora de les nueses fronteres. El so esquisitu sabor y el so inconfundible golor convirtieron esti quesu azul nunu de los símbolos de la gastronomía asturiana. Y bona parte del so ésitu débese a la so ellaboración artesanal. Esti manxar naz de la lleche del ganáu alimentáu en camperes de monte del conceyu que-y da nome, Cabrales. Un conceyu que guarda tres los sos verdes praos un auténticu paraísu dignu d’afayar.

Queso de Cabrales

Los montes del conceyu fueron testigos de la hestoria de la Humanidá a lo llargo de los sieglos. El so abruptu paisaxe escuende, mui cerca del escobiu de Les Estazadas, una gran galería qu’atesora la representación de bisontes meyor caltenida d’Asturies. La Cueva de la Covaciella foi afayada nel añu 1994 cuando se realizaben una serie de voladures pa enanchar la carretera. Nel so interior atópense un conxuntu de pintures rupestres en bon estáu de caltenimientu.

La colección de dibuxos de bisontes, caballos y venaos pertenez al arte paleolíticu del periodu magdaleniense, d’aprosimao del añu 14.100 a.C. A traviés d’estes representaciones puen apreciase les principales técniques qu’emplegaben los pintores d’aquella dómina. Anque la cueva permanez pesllada al públicu, puede visitase un retruque completu del covarón en La Casa Bárcena.

[Tamién t’interesa: La ruta del Cares]

Esti espaciu, allugáu en Carreña, la capital del conceyu, tien amás una colección de pintures dedicada a Enrique Ferreros. L’artista madrilanu foi dibuxante, humorista, cineasta, montañeru y pintor, amás de convertise na primer persona que pernoctó, en 1933, nel visu del Uriellu. La so obra ye un fiel reflexu del amor al monte, unu de los principales curiosos qu’atesora’l conceyu.

L’aldea ‘perdida’ de Bulnes

Y pa esfrutar del monte con toles lletres nun puedes dexar de visitar el pueblu de Bulnes. Trátase d’una encantadora aldea asitiada a 649 metros d’altitú y qu’apenes cunta con 34 habitantes. Esta localidá perdida nel monte cabraliegu cunta cola particularidá de nun disponer de carretera. Mientres munchos años, los sos vecinos tuvieron que percorrer a pie un senderu al traviés de la Canal del Texu pa llegar a Poncebos. Sicasí, dende 2001 un funicular traviesa les caliares de los Picos d’Europa pa xunir el pueblu col restu del mundu. Esta circunstancia permitió que la vida n’aldea siga calteniendo la esencia d’antaño. Un rincón de cuentu nel que son visita obligada’l campusantu de montañeros y la preciosa ilesia parroquial de San Martín.

Los miradores son unu de los principales reclamos del conceyu. Auténtiques talayes dende les qu’esfrutar de la naturaleza n’estáu puru. Unu de los más emblemáticos ye’l mirador del Pozu de la Oración, asitiáu mui cerca de Po de Cabrales y con unes privilexaes vistes del Urriellu y los Picos d’Europa. Tamién merez la pena asomarse dende la mayada de Tebrandi, nes mesmes faldes de la Sierra del Cuera, y al mirador Pedro Udaondo, dambos mui cerca d’Asiegu. L’aldea, Premiu al Pueblu Exemplar d’Asturies, en 2019, esfruta d’unes espectaculares vistes de los Picos d’Europa.

La singularidá del sistema kársticu dibuxa un serrapatosu conceyu regáu d’espectaculares paisaxes y un entornó únicu pa esfrutar del turismu rural y d’aventura. El senderismu, el trekking, la esguilada, les escursiones en barayones, l’esquí de monte, la espeleoloxía y el descensu de cañones son solo dalgunes de les aventures con mayúscules de les que vas poder esfrutar en tierres de Cabrales.