Los nuevos dinosaurios del MUJA

Trátase d'un nial de Triceratops, con güevos ensin eclosionar y críes que yá salieron d'ellos

El Muséu del Xurásicu d’Asturies (MUJA) acondicionó una nueva escena nel xardín. Trátase d’un nial de Triceratops, con güevos ensin eclosionar y críes que yá salieron d’ellos. La escena xúnese a la nueva tonalidá de los dos exemplares d’esti dinosauriu herbívoru del Cretácicu que yá s’atopaben nel xardín del MUJA. Esta zona del esterior del muséu cunta con pieces orixinales del xurásicu y reproducciones de dalgunos de los reptiles más representativos de la Era de los Dinosaurios.

La reorganización y acondicionamientu del espaciu esterior yá permite al públicu ver una escena con dinosaurios carnívoros del Cretácicu, una pareya de Deynonychus y un Carnotaurus, y otra de Brachiosaurus con un exemplar adultu y dos reproducciones de críes d’esta especie de reptil xurásicu.

Nel xardín del muséu tamién pueden vese reproducciones de cuatro dinosaurios xurásicos, realizaos especialmente pal Muséu por Adolfo Cuétara, amás d’otros grandes reptiles pertenecientes al Cretácicu, répliques parciales de los xacimientos de icnitas de los cantiles de Tereñes y de la sablera de la Griega en Colunga, con delles meses d’interpretación en castellán y braille, y un caxón d’escavación pa que’l públicu infantil pueda conocer cómo se realiza’l trabayu paleontolóxicu.