Lletrones de Nava

Falar de Nava ye falar de sidra. El conceyu ye una referencia de la bebida más tradicional d’Asturies. El Festival de la Sidra Natural, declaráu d’interés turísticu nacional, convierte cada añu a la capital de conceyu en referencia de la cultura qu’arrodia esta bébora. Pero más allá de la sidra, Nava escuende auténticos monumentos naturales.

Les Praeres

Les Praeres diéronse a conocer l’añu pasáu al convertise n’escenariu d’una de les etapes de la Vuelta a España. La carretera que da accesu ye un auténticu retu pa los aficionaos al ciclismu, con malapenes cuatro kilómetros y una pendiente media del 13,5%. Esta zona de monte enclavada en plena sierra de Peñamayor ye un espaciu de gran valor medioambiental. N’él podemos esfrutar d’una amplia vega de verdes y rellucientes praos, pasiar por una redolada con vistes envidiables y conocer a ‘Bambi’, un venáu conocíu pola so participación na película ‘Atrapados’ que saluda a tou aquel que s’avera al llugar. 

Mayaos d’Anes

Siguiendo una de les pistes que sal dende Les Praeres llegamos a los mayaos d’Anes. Lo qu’atopamos al llegar ye un llugar idílicu formáu por verdes camperes entemecíes con zones montiegues nes qu’abonden espineres, xardones, fayes y dalgún qu’otru texu. Si continuamos el camín en dirección a Peñamayor alcontraremos unes espectaculares vistes de los Picos d’Europa.

La Mata’l Texíu

Fayeos, acebos y texos. Na fastera oriental de la sierra de Peñamayor, onde’l conceyu de Nava s’encuentra col de Llaviana, atópase’l Matu del Texiu. Trátase d’un espaciu natural caracterizáu pola esistencia d’una masa forestal n’escelente caltenimientu. Un espaciu únicu que cunta cola mayor estensión de pacionales del municipiu, una amuesa del intensu manexu ganaderu de la zona.

Les foces del Ríu Pendón

Conocía como la pequeña Ruta del Cares, les foces del Ríu Pendón escuenden un auténticu paraísu d’agües cristalines y montes de fayes y carbayos centenarios. El senderu entama en Fuensanta, xunto al vieyu balneariu, y adiéntrase ente montes centenarios de castañales. La sienda hacia Pendón, tallada na roca, ofrez maraviyoses panorámiques de les agües braves y cristalines del ríu abriéndose pasu ente los murallones caliares. La exuberante vexetación treslládanos a ún de los paraxes más bellos d’Asturies pola so selvaxe virxinidá respetada al traviés de los sieglos. L’itinerariu completu tien una distancia de 10,2 kilómetros, con una duración d’unes cuatro hores y una dificultá media/baxa.