Güei sábadu, día 14 de payares, a les 22:30 hores, la Televisión del Principáu d’Asturies (TPA) va emitir la XII edición del Premiu Camaretá al Meyor Cantar. La gala celebrada nel Cine Fantasio de Navia va ser presentada por Fernando Valle Roso y Norma Menéndez.
El Premiu al Meyor Cantar, que nesta edición incorpora’l nome Camaretá como homenaxe al grupo cultural y musical tan activu na recuperación de la cultura asturiana nos años 70, nació nel añu 2007 como reconocimientu del Gobiernu del Principáu d’Asturies a la creación musical en llingua asturiana o gallego-asturianu. El prestixu y sonadía d’esti gallardon medra con cada edición, de manera que ye yá un referente ente los creadores musicales asturianos. Nestos años pasaron per él dellos de los meyores grupos ya intérpretes de la escena del país, con munches y diferentes propuestes que muestren la vitalidá y dinamismu de la música fecha en llingua asturiana y gallego-asturianu. Dende Toli Morilla ganador de la primer edición, Dulcamara, Alfredo González, Xera o Skama la Rede hasta Lafu y Rebeca dúu ganaor de la última edición.
La Conseyería de Cultura, Política Llingüística y Turismu ye la qu’aprueba les bases reguladores del «Premiu Camaretá al Meyor Cantar» y nel que s’otorga al ganador/a/es un premiu en metálico de 6.000€, un troféu y la producción d’un videoclip del cantar ganador pa la so difusión depués. El xuráu, presidíu pol director xeneral de Política Llingüistica, Antón García, tuvo integráu polos músicos Naomi Suárez, Pablo Moro y Alicia Álvarez, la periodista y escritora Aitana Castaño y la filóloga y profesora Mercedes Ruisánchez. Pa decidir los cuatro finalistes d’esti añu, tuvieron en cuenta la calidá de la composición y la interpretación vocal ya instrumental de los cantares, amás de la corrección llingüistica de la lletra y l’usu de la llingua.
Cuatro son les pieces finalistes, que van intentar facese col galardón: Rambalín, de Rodrigo Cuevas, La mesma revolución, de Silvia Quesada, Cantar pa durmir un ninin, de Mapi Quintana, y L’espeyu, de Slum Suit. Los cantares van interpretase na gala final del Premiu Camaretá, tres la que se va dar a concer el cantar ganador d’esta edición.
“PREMIOS CAMARETÁ AL MEYOR CANTAR. UNA LLINIA TRAZADA 2007-2019”
Y de siguío, a partir de les 00:00 hores, TPA va emitir un programa especial decicáu a la historia del Premiu al Meyor Cantar dende la so creación nel añu 2007.
Nel programa, d’una hora de duración, van recordase tolos cantares que fueron reconocíos con esti gallardón, ente otres: “Azul y gris”, “Tierra”, “Si nun conoces Val.louta”, “Ensin ti”, “Volviche”, “La lloca” o “Les sombres sobre la yerba”.
Los Meyores Cantares esti sábadu, dende les 22:30 hores, en TPA.
